Qiao...

「我返黎啦～」
「到左嗱？」
「我返左黎香港啦～」

話說今朝早機去首爾，十點左右起飛，上機後全程同同事Ｊ吹水，吹到耳都塞左，不知時日。

忽然同事Ｊ望出窗外話：「到嗱？」
我又望一望：「咦？係喎，海喎。」
同事Ｊ：「唔係喎，陸地喎，冇雪喎。」

停定，廣播話原來機件故障，飛左三分一折返，唔怪之得頭先耳都塞左，原來係勁速急降。

同事Ｓ話生死有命。哈！我地重傻下傻下，唔知唔覺咁，真係都死左都唔知發生乜野事，真掂當～

好～十二點半再出發！

細個果陣，老豆就話共產黨文革鬥爭，破壞傳統破壞教育，禍害幾代中國人；又話英國佬臨撤退殖民地，實會留低ｄ蘇州野，冇個殖民地有好結果；老豆重話美國佬扮哂世界警察，查實專搞分化，德國朝鮮越南中台，都俾美國佬搞過，咁就可以一國獨大，兼且賣軍火搵錢。雖然聽落都冇乜邊個政府係好野，不過老豆教識我共產黨衰，英國佬美國佬都唔係好野，算係我社會科既第一課。

當年紀大左，我嘅演譯就變成：民建聯勁唔得，白鴿黨都唔見掂；大公不可信，蘋果咪一樣偏激。我咁樣講，點都會有人入係我保皇建制，政治不正確，維園阿伯。確實兩者係有程度分別，咁係咪五十步就唔鬧得？又或者一定要企是但一邊先至係有立場？

老石話我問咁多，就一樣係非主流，佢話我家陣就好似同紅衛兵討論共產主義，唔表態支持，結果一樣要死，家陣就係咁兩極。

又嘗試企響非建制果邊諗，真係講唔出有乜錯，不過就硬係覺得唔妥；朋友Ｂ解話，佢話如果只准你答啱定錯，班友講D野實係啱架喎，你只要將任何討論都推到上神枱，下下出人權，事事都吹到去公義，就冇得錯；好似細路唔肯讀書，試問聲咁唔想讀得唔得先，細路係咪冇人權吖；又或者要破壞人地家園以求發展，咁係咪不公義吖；只因諗得太兩極，咪冇得好討論。而覺得唔妥當，係因為我地會諗，去到咁理想，點落實先？講到落實，就真係得個吹字。再者，當去得咁高咁理想，但係你眼見ｄ忽然鬼上身嘅議員，好鬼交戲揾食，咪就唔妥佢地囉。

咁係咪唔理性呢？係啩；但唔理性又點呀，信民主的話，大家果票都係咁高咁大，話之你識字唔識字，理性定感性，有人要理想又好，有人要實際又好，各有各講。諗到呢度，是對是錯，有乜好諗，安樂哂。

當爭議不在於高鐵，而在於香港政府不是全面直選，那一步可怎樣？假如直選政府可以讓香港跳出爭議內耗，當然要爭取全面直選。而另一個爭議性的問題是：如何可能。團結民意？街頭抗議？集會遊行？入局擲蕉？絕食自焚？

早前讀《改革歷程》，讀到黨內利用天安門學生，將尊敬的趙紫陽總理拉下馬，心裡沉重得不能再讀下去。改革一書，就連讀下去也如此困難，在現實中，就算我們的CEO良心發現，去跟保守的阿爺討價還價，又會有甚麼好計謀？我們又有多少籌碼？年青的理想的當然是說知其不可為而為之，但政治上又怎樣呢？

我期望中國會向好的一方發展，只是當阿爺還有太多的要去處理的，會犯得著為這彈丸之地增添變數麼？若上海能夠接班，色衰的香港又會怎樣？要在10年之內全面直選，樂觀麼？

在叫罵聲之餘？若你是CEO，又可以如何呢？

我沒有答案。

高鐵事件帶來連串問題，想得腦脹…

有說為著部分人的長遠利益，但要毁人家園，不合乎正義原則？同意吧。接下來又有人會問，有甚麼長遠利益呢？若利益真的成立，家園可以犧牲麼？利益是指經濟利益麼？那我們不應該只看重經濟利益？還要有多方面考慮，那多方面又是那些方面？但怎樣的多方面考慮才不算空洞呢？

當政府要靠建制派議員，要靠功能組別議員，才能將議案通過，是議案不得民心？若議案不得民心，是建制派議員有利可圖，跟民心作對？建制派議員都是短視，都指是看重經濟利益？泛民議員都是正義？高瞻遠矚？考慮全面？還是只是迎合目標選民的配合動作？

沒有直選，議員都可以跟民心作對？直選可讓議員都變得高瞻遠矚？直選應該可讓政府決策變得貼近民意？貼近民意的決策就是對公眾有利？直選就可以減少意見紛紜？

認為政府決策不妥當，理應反對，反對無效則官迫民反？革命？當意見對立，又當如何？多元就只是要溫和的聽從激烈的？要大聲的去支配沉默的麼？意見分歧可以如果處理？應如何去說服對方？應如何去影響對方呢？

改變不了現實，改變不了制度，改變不了討厭的嘴臉，可以怎樣？

還有很多…很多…

第一次遇上呢齣野，真係講完個戲名都係下一聲，心諗搞乜呀!? 睇埋個英文名The Men who stare at Goats，依個戲名都算係有ｄ根據喎。再望見居然係George Clooney, Ewan McGregor, Kevin Spacey，但以宣傳黎計，呢齣野一定唔係正路野，好自然就諗起齣《CIA光碟離奇失竊案》，冇任何預告準備之下，咁就買飛入場搏搏。

劇情真係唔多講。睇海報都估到有ｄ騎呢，冇瘋狂爆笑，有古仔，有劇情，但係真係一路睇，一路笑住話痴線，好低能，認真地低能。George Clooney周星馳上身，今次真係勁加分。荒誕得黎重有多少暗串美國佬，絕對係我杯茶，搏中！

後記：睇完呢齣野出黎，就收到SM夫婦來電，問有乜戲好睇。就叫左佢試下呢齣野，不過，最後都補多一句：「睇左阿凡達未呀？」，話哂都正路ｄ呀嘛。