波茲南

當只得有限時間，又冇充足準備，唯有用啲懶惰嘅方法，search下"Tourist centre"嘅位置先，去到當地旅遊中心先至算。旅遊中心通常都係就近當地嘅旅遊點，而波茲南同弗羅茨瓦夫嘅旅遊中心，就係位於當地嘅舊城區內，於是我地就向舊城出發喇。

上午十點半起程，原來三個半鐘車程，搞一輪個GPS，又响柏林兜兜轉轉塞下車，卒之揸左接近五個幾鐘至去到。

一去到舊城區外圍，就經過公眾停車場，泊低車行一陣，就到達舊城廣場。

廣場唔算太大，行左個圈，去找換店換返啲盤川，1歐羅兌換大概4波蘭茲羅提Zloty；然後就求其坐低响一間叫做Post Cafe嘅小餐廳；呢間餐廳啲野又幾好食喎，埋單時，多口問下附近有乜小旅館，餐廳阿姐介紹我地去試下一間叫做Villa Atelier嘅小旅館；好好彩，因為預訂人客冇黎到，旅館剩左間四人大房，而收費又按人頭計，包早餐，價錢相宜，一於搬行李過黎囉。雖然只留一晚，總算一切順利，有地方落腳。

落腳後再出去行下，波茲南舊城同一般歐洲舊城差不多，四層高嘅房屋圍成一個方形廣場，廣場主最突出有尖塔嘅就係舊時市政廳，今日嘅波茲南歷史博物館；旁邊有一排不同顏色窄長嘅Merchant Houses，不單只吸引遊客，就連本地新人都响呢度影婚紗相。

由廣場向東行出去，有一條平常寧靜嘅小街，細心地留意鋪頭廚窗，先至發現原來係殯儀街黎，但係行過隔離街，就成街都係小餐廳酒館，哈！醉生夢死，真係近到你估唔到。

* * *

行到七八點，個天重未黑，不過都係時候食晚飯。唔想又係幫襯廣場啲遊客餐廳，我地走返出去外圍啲小街，真係花多眼亂，居然各國啲菜式都有，重有好幾間日本菜館添。兜左一輪，睇返旅館姐姐嘅介紹，睇下啲招牌，原來介紹果間本地餐館，就係正面前，費事再諗，都係試下啲地道野。

於是，我地嘗試到波蘭嘅牛肚湯同餃子。

牛肚湯嘅牛肚切成幼條，加上胡椒，味道同胡椒豬肚湯一樣，飲完成個人暖左。至於餃子，有芝士餡、肉餡同菜餡，烚熟伴菜上碟，半月形，大大隻，皮厚厚，味道就真係試過就算喇。

後記：我地中國人總會懷疑，餃子都係馬可孛羅由中國傳到西方，但某網頁介紹，波蘭餃子係由俄羅斯傳入，兼且皮薄餡多，真係不知孰真孰假喇。